كيف قسمت غرفتي / جوله في غرفتي

انا ما عندي غرفه ملابس للأسف و دولابي ما احسه يكفيني. عشان كدا قررت اقسم غرفتي لجهتين، جهه زي مأنها غرفه ملابس و الجهه التانيه للنوم و غيره. 

صار اول ما تدخلي غرفتي يكون الدولاب القديم على يمينك و قدامك الدولاب الجديد و على اليسار الدولاب اللي جبته و سويته للجزم و جمبه حق اكسسواراتي و مناكيراتي. 

قررت اخد دولاب مفتوح عشان يكون كل شيء قدامي و احس انه احلى الصراحه مع انه مو كويس مع غبار الرياض بس لسه ابغاه. اخدت دولاب من ايكيا (انا اكره اشياء ايكيا لانها مره ما تتحمل بس اخدته لانه اسرع شيء) دولاب مفتوح يجي الايطار الخارجي فقط و انتي تختاري ايش تبغي جوا. هما عندهم اشكال جاهزه و ممكن تقولي للرجال يطبع لك ورقه بايش الاشياء اللي تحتاجيها و انتي تجيبيها من مخزنهم (عارفين نظام ايكيا) انا اخدت واحد يشبهه اللي عندهم بس غيرت كم شيء من جوا. اخدت ٤ رفوف و ٤ ادراج و حقت الجينزات و علاقات الملابس. حاكتب كل اسماءهم تحت بالانجليزي عشان اذا تبغوهم تروحوا لهم على طول. 

اخدت ادراج من قدام زجاج، خليت درج لملابس الجيم، درج للكروب توب و البوديز، درج للاكسسوارات الشتويه (قفاازات و سكارفات) و درج للبكيني و المايو. و ناويه اخلي الرفين اللي فوق و اللي تحت تخزين بس ابغى اجيب علب مرتبه احط اشيائي فيها. 

الدولاب حق الجزم اخدته لانه مفتوح من الجهتين يكون كويس لو انحط في نص الغرفه عشان ما تصير الغرفه مكتومه و شكلها ضيق. حطيت فيه بس الكعوب و البوتات القصيره. الجزم اليوميه و الشباشب في دولاب تاني و حتى البوتات اللي تكون عاليه توصل للركبه و فوق. في العلب اللي تحت حطيت شنطي و جمبهم علبه صغيره فيها الستريتنر و الفير بس ناويه اشيلها مو عاجبتني هناك. ناويه كمانا اجيب علب للشنط الباقيه (عندي شنط كتير لو لاحظتوا) و في شنطه كبيره حقت مارك جيكوب حتخرب لو حطيتها معاهم فخليتها في مكان لحالها. 

الجزء اللي جمب الجزم، نفس الدولاب بس صغير حاطه فيه بعض الكتب اللي قرأتها و جمبها نظاراتي الشمسيه الزايده و اكواب القهوه حقت الخروج. 

فوقها في كل اكسسواراتي مقسمتهم في اشياء صغيره. على الجمب في مكان معلقه في اساوري و سلاسلي و نظارتي الشمسيه اللي استخدمها حاليا. فوقهم في كل مناكيراتي و شمعه. 

ما حاوريكم الجهه التانيه لاني وريتكم هيا زمان. بس فيها مكتبي اللي قلب تسريحه و جمبها الرفوف و المرايا الطويله. و قدام المكتب في سريري.

اسماء الدواليب:

دولاب الملابس - Pax

الرفوف - KOMPL shelf

الادراج - KOMPL drawer with glass front

حق الجينزات - KOMPL P-Out trouser hanger 

دولاب الجزم - Kallax