مفضلاتي ل٢٠١٤

زي ما كل احد يقول السنه طارت من جد ما حسينا فيها مع اني احسها شيء صار مره زمان بس لانها بسرعه اتوقع. حأتكلم عن ١٤ منتج ما اتخليت عنهم في ٢٠١٤ بالنسبه للميك اب و الشعر و الجسم.

١- فاونديشن مارك جيكوبز

من أحسن الفاوديشنات اللي جربتها، شكله طبيعي و يقعد فتره طويله و تغطيته ممتازه. اذا تبغوا تعرفوا عنه اكتر كتبت عنه في انستقرام

٢- كونسيلر ميبلين فت مي

مره جميل يندمج بسهوله ما ينشف الجلد تحت العيون، يقعد فتره طويله. برضو كتبت عنه في انستقرام

٣- بودرة من تارت سموث اوبريتر 

كتبت عنها في مفضلاتي قبل كدا، مره احبها لتحت العين عشان تمنع الكونسيلر من انه يخطط

٤- شيمر بريك من بوبي براون Sand Stone

هايلايت جميل بدون جليتر كبير بس شيمر يعطي لمعه حلوه للوجه و اللون هادا مره حلو بس اتوقع انه كان لمتد

٥- بلش من بوبي براون لون Pink Rose

بلش يعطي لون طبيعي للوجه و احسه ينفع لكل درجات البشره. كتبت عنه قبل كدا 

٦- شادوات انجلوت

كتير اتكلمت عنها و اقول قد ايش هيا احسن و ارخص و اكبر من شادوات ماك. سهله في الدمج و الوانها قويه و ارخص منها مافي !

٧- ايلاينر انك من كات ڤون دي

بعد ما استخدمته سحبت على كل الايلاينرات اللي عندي. مره يسهل الرسم و فرشته جميله ما ينشف زي باقي اقلام الايلاينر. و لونه قوي و ما يروح بسهوله. كتبت عنه قبل

٨- ماسكارا من اور قلاس

تعطي الكثافه و الطول المناسب. انا احس الكثافه اكتر من الطول و هادي تعطي كثافه مره مع طول متوسط و ما تفتت مع الوقت

٩- بودرة الحواجب من وت اند وايلد

بودره صارلي اكتر من سنه استخدمها استخدم الفاتح لبداية الحواجب و الغامق لبعد ركن الحاجب. و مرات استخدم الشمع اذا ابغى اثبته لفتره اطول. مره حلوه و تقعد فتره طويله و ما تطيح شعر الحواجب و تجي معاها فرشه صغيره و ملقاط صغير. كتبت عنها في بدايتي في انستقرام يعني الصوره مره بعيده 

١٠- ارواج ميلاني

احسن ارواج من الدرق ستور، الوانهم رهيبه و متنوعه. تبان من اول طبقه و ريحتها مره حلوه زي البطيخ و ما تنشف الشفايف و ما تروح بسهوله

١١- بخاخ ايربان ديكاي ستيي اول نايت

بخاخ مثبت للمكياج ابخه قبل و بعد المكياج عشان يثبت و يقعد طول الليل ! مره احبه للسفر و للمناسبات

١٢- كريم للشعر من نوت يور موثرز اسمه سموث موڤز

كريم يخلي الشعر ما ينشف بس تحطي منه شويا في يدك و توزعي على شعرك و هوا مبلول، مره فادني في السفر بالذات في الأماكن اللي فيها رطوبه ما صرت اتخلى عنه ابدا

١٣- مناكير من سيفورا اكس درجة SIngularity

مناكير مطفي بس فيه لمعه بسيطه مره غريب و لونه رمادي على بني مع لمعته على موڤ شويا مره احبه دائما احط منه و كل احد يعجبه. في صوره له على اظافري في انستقرام

١٤- عطر ڤيڤا لا جوسي نوار

من أحلى العطور اللي جربتها ريحته غريبه ما تنوصف الصراحه لازم تجربوها

كدا اكون خلصت كل شيء اتمنى انها تكون سنه حلوه علينا كلنا و تكون السنه الجايا احلى، احبكم