جيم نيويو صارلي مشتركه فيه تقريبا ٥ شهور، حسيتها مده كافيه اني اتكلم عنه و اعطيكم التفاصيل. الجيم جدا مرتب من الألف الى الياء. في كل شيء منظمين
و نظيفين.
اول شيء الجيم مو أي احد يدخله يعني كل مشتركه لها اسواره خاصه فيها أول ما تدخل في جهاز يسوي سكان للاسواره و بعدها يخليك تدخلي. اذا ما عندك ما تقدري تدخلي. عند المدخل طبعا في ريسيبشن فيه الموظفات اذا محتاجه شيء. في الدور اللي تحت فيه مكان الكلاسات و اللوركرز و في المدخل في كم كنبه للانتظار و الاستراحه. غرفة اللوكرز كبيره و مقسمه. لوكرز في كل مكان و في اليمين في الشاور و الحمامات (الله يكرمكم) الشاور لوحده و الحمام لوحده عشان ما يصير زحمه. في ٣ شاورز. و كلها نظيفه مره. في اليسار من اللوكرز في غرف الملابس و التغيير. و كمانا حاطين بينهم مرايا كبيره و معاها سشوار
عشان اذا محتاجته بعد ما تخلصي. عجبني انهم مهتمين بأدق التفاصيل.
بعدين الدور التاني فيه آلات الرياضه و غرفه للمدربه و غرفه خاصه اذا ماخده كورس مع المدربه. الالات كتيره و منوعه. في جزء نسيت اصوره اللي هوا حق التدريبات اللي ما تحتاج الات فيها اأثقال بجميع انواعها و الحبال و الكور. مرات تصير زحمه في وقت الذروه اللي هوا بعد الساعه ٥ غالبا. انا دائما اروح الظهر فما اواجه اي مشكله الحمدلله.
في شيء عجبني انهم حاطين مكينه فيها اكل صحي يعني بروتين بار و قرانولا و كذا. فيها كمانا اقفال اذا ما عندك قفل للوكر و قوارير مويا. طبعا برادات المويا موجوده في كل مكان.
اول ما تشتركي يعطوكي موعد مع مدربه عشان تعلمك على كل شيء في الجيم و تشوف ايش جسمك يحتاج و تعطيكي نصايح. و ممكن بعدين انتي تتابعي معاها. و كمانا عند الالات دائما في مدربه عشان اذا احد احتاج مساعده او شيء. و تجي تحفز الحميع بين فتره و فتره مره عجبتني الحركه يعني اذا شافت وحده قاعده على جوالها نا تسوي شيء تخليها تشتغل.
الكلاسات عندهم بالحجز، شيء عجبني عشان ما يصير الكلاس زحمه. الحجز يكون عن طريق موقعهم تدخلي عليه و تدخلي على حسابك فيه و تحجزي. و اذا ما جيتي على حجزك يحرموكي من الحجز لفتره معينه. عشان ما تاخدي مكان ناس محتاجين و في النهايه تسحبي عليهم.
اشتراكاتهم ٦ شهور او سنه مافي اقل. ما انذكر الاسعار لانها تختلف اذا سووا عروض انا اتذكر اخدت ٦ شهور و كان العرض انه في شهر مجاني و كل هذا في حدود ٤٠٠٠ ريال. مره كويس بالنسبه للجيم و ترتيبه و نظافته. الاسعار كلها موجوده في موقعهم. هما عندهم فرعين واحد في حي المروج و واحد في الياسمين. انا اروح حق المروج لانه اقرب لي. طبعا اذا تبغي تشوفي المكان قبل ما تشتركي لازم تكلميهم و تاخدي موعد.
اتوقع اني غطيت كل شيء عنهم و حأترك لكم معلوماتهم تحت عشان اللي تبغى تشترك منهكم.
فرع الياسمين 0118104111
فرع المروج 0112143710
انستقرام: @nuyufitness
شكرااا ع المعلومات
ReplyDelete