بعد ما صبغت شعري موف اول مره بدأت اتفرع في الموضوع و ادور الوان جديده و طرق جديده. بما اني سحبت لون الاطراف للاومبري بدأت اسوي فيها اللي ابغى عشان عارفه انها تعبانه و في النهايه شعر و حينقص. لمن كنت في امريكا لقيت انواع و الوان كتيره فقررت اني اغير و اصبغ اكتر من لون.
اخدت من التا صبغه اسمها بنكي كولورز، كان عندهم الوان كتيره اخدت ازرق فاقع و فوشي. و من محل اسمه هوت توبك اخدت التانيه التركواز اللي هيا روو. ما كنت احتاج اني اسحب لون بما انو شعري ساحبه لونه من اول. بس قلت قبل ما احطها حاجرب على خصله لانو دائما يقولوا لمن تحطي ازرق على شعر اشقر غامق يقلب اخضر. جربت على خصله و الحمدلله لون التركواز ما قلب يمكن لانه اصلا مايل للاخضر.
هادي صور للعلب و اسماء الشركات و الدرجات
الطريقه:
١-ما كان عندي لون موڤ قمت خلطت شويا ازرق مع فوشي و سوا نفس درجه الموف اللي كان عندي من مانك بانك.
٢- قسمنا شعري لطبقات و كل طبقه قسمناها خصل. كل طبقه لون بدأنا موف بعدها تركواز و العكس الين ما خلصنا.
٣-كل خصله كنا نغلفها بقصدير عشان ما تجي الالوان على بعض و تتلخبط
٤-خليتها نص ساعه زي ما كان مكتوب على العلبه.
٥- غسلتها بمويا
الصبغه زي مانك بانك مؤقته يعني ما تقعد فتره طويله تقعد شهر ممكن اقل على حسب نوع الشعر و كم مره تغسليه.
الفرق بينها و بين مانك بانك:
*مانك بانك ريحتها كانت غريبه يمكن لانها طبيعيه مره، هادي برضو طبيعيه بس ريحتها زي اللبان او حلاوه بس ريحه حلوه مره. و قعدت في شعري حتى بعد ما غسلته.
*مانك بانك عشان تمسك و تكون احسن نتيجه تخليها اقل شيء نص ساعه انا اتوقع خليتها ساعه او اكتر. اللي استخدمتها دحين اقل شيء تخليها ١٥ دقيقه و انا هليتها نص ساعه.
*لسه ما اعرف قد ايش حتقعد حاكتب عنها بس تروح الصبغه، بس مانك بانك قعدت شهر و نص.
الصور الجايا فيها النتيجه النهائيه بنور الغرفه و الشمس. دائما الالوان تطلع قويه و فاقعه في الشمس.
اذا انتي اول مره تبغي تصبغي لون زي كدا و شعرك غامق لازم تسحبي لون لانه ما حيبان بدون سحب اللون. اذا تبغي تعرفي انا كيف سويتها اول مره شوفي التدوينه حقت صبغه مانك بانك و في انستقرام تلاقي اول مره كيف سحبت لون شعري عشان اسوي اومبري.
No comments:
Post a Comment