كتير بنات يحسبوا اني اكل صحي ٢٤ ساعه طول الأسبوع، طبعا هادا الشيء خطأ. انا اكل صحي طول الأسبوع و في الويك اند اخرب شويا بعقل طبعا مو اكل كل شيء اشتهيه. و حتى مرات في نص الأسبوع اخرب بس كل شيء بحدود. أكل اللي اشتهيه بس بأقل كميه ممكنه. و كتير اشياء اشتهيها استبدلها بشيء صحي و يشبهه. من الاشياء اللي اشتهيها مرات هوا الشيبس شفت وصفه في يوتيوب عن طريقه شبس صحي بس بأشياء مو متوفره عندنا غيرتها و سويتها و طبعا ادمنتها. و في كم طبق غداء تقريبا اسويها كل كم يوم. الوصفات اللي حأكتبها تحت هيا: شيبس البراسل سبراوت - فول الصويا الاسيوي (طريقتين) - اومليت مكسيكي- سموذي زبده الفول السوداني و المربى
١- شيبس البراسل سبراوتس، لمن اشتهي شيء مالح و مقرمش انصحك انك تسويها
اول شيء جبت البراسل سبراوت قطعته من تحت و بدأت افكك اوراقه عن بعض بعدها غسلتها كويس و نشفتها. سخني الفرن على ٢٠٠ درجه مئويه. بعدين حطيتها في زبديه مع شويا زيت زيتون و ملح خلطتها كويس بعدين وزعتها في صينيه و اتأكدت انو الاوراق مفصوله عن بعض و كلها في طبقه وحده. انا غطيت الصينيه بورق الخيز عشان ما تلصق في الصينيه. دخلتها الفرن لمده ١٠ دقائق ممكن تقلبيها كل ٣ دقائق عشان تصير مقرمشه من كل الجهات. طبعا ممكن توزعيهم في اكياس و تخليها لوقت تاني ما تخرب على طول.
٢- اطباق فول الصويا، اذا ما لقيتي فول الصويا تقدري تستخدمي الفاصولياء العريضه. انا اكلها كوجبه غداء
المقادير:
للطريقه الأولى: فول الصويا (او فاصولياء عريضه)، صويا صوص، عسل، فص توم، زيت سمسم
للطريقه التانيه: فول الصويا، زيت سمسم، ليمون، ملح
الطريقه الأولى: غسلي الفول او الفاصولياء كويس و بعدين بس قطعي الاطراف. سخني ملعقه كبيره زيت سمسم على النار في طاوه. شرحي فص ثوم و حطيه في الزيت الين ما يصير لونه ذهبي بعدها حطي الفاصولياء و خليها على نار عاليه. انا احبها مقرمشه و اخليها تصير شويا ذهبيه بعدين ابدأ اقلبها بس تحسي انها بدأت تلين حطي عليها ملعقه صغيره صويا صوص و ٣ ملاعق عسل. قلبيها شويا و شيليها من فوق النار و قدميها.
الطريقه التانيه: نفس الشيء غسلي الفول و قطعي الاطراف. سخني الزيت و حطي الثوم (ممكن تتخلي عن الثوم عشان تخليها سناك بدال وجبه) حطي الفاصولياء او الفول على النار و بس يصير ذهبي قلبيه مويس الين ما يصير شويا لين و شيليه من فوق النار. حطي شويا ملح على حسب الرغبه و عصره ليمون. مره يطلع لذيذ و خفيف.
انا مرات استبدل فول الصويا بشيء تاني مثلا يوم استخدم البراسل سبراوت يوم بروكلي على حسب اللي يكون متوفر عندي. هادا نفس الطبق سويته بالبراسل سبراوت و كان عندي بواقي اكل ياباني حطيت لحمه ترياكي فوقه. اذا ما تعرفوا شكل البراسل سبراوت شكله زي الخس بس صغار تلاقوا صورته في انستقرام عندي.
٣- اومليت مكسيكي، طبعا هادا فطور و انا من المدمنين عليه بس اسويه في الويك اند بما انه ما عندي وقت في الصباح في نص الاسبوع
المقادير:
بيضه، حليب، جبنه فيتا، اڤوكادو، فلفل هالابينو، فلفل اسود
اول شيء قطعي الهالابينو لقطع صغيره (اذا ما تحبي يكون حار لا تحطي البذور)، اخلطي البيضه مع شويا حليب و حطي عليها الهالابينو و حطي اوصال صغيره من جبنه الفيتا و الفلفل الاسود اخلطيهم كويس. بعدين سويها زي الاومليت على النار او ممكن تسويها بيض مقلي عادي مو لازم اومليت. جيبي نص حبه اڤوكادو مستويه و بالشوكه بس اضغطي عليها و على طول حتصير زي في الصوره. قدميهم مع بعض. انا شخصيا احب الاڤوكادو ماما ما تحبه بس مره عجبها هنا. جربي ما حتخسري شيء.
٤- سموذي زبده الفول السوداني و المربى، لمن تكوني محتاجه شيء حلو او جوعانه بين الوجبات او حتى فطور جربي. انا اخدت الوصفه من منى (صاحبتي و عندها اكاونت انستقرام تلاقوه عندي في اكاونتي) بس غيرت كم شيء فيها.
المقادير:
٤-٦ حبات فراوله، موزه مجمده، ملعقه كبيره زبده فول سوداني، نص كاسه حليب.
اول شيء اخدت الفراوله وخلطتها مع ملعقتين صغيره سكر تروڤيا (محلي طبيعي او ممكن تستبدلي بعسل) عشان تعطي الفراوله نفس منظر المربى. بعد ما تخلطيها حطيها في كاسه. في نفس الخلاط حطي الموز (ما كان عندي موزه مجمده اضطريت استخدم ثلج) و زبده الفول السوداني و الحليب اخلطيهم كويس و حطيهم فوق الفراوله. يطلع شكله حلو طعمه لذيذ.
طبعا في وصفات كتيره للأكل الصحي هادي بعضها، و في كتير منها غير اللي هنا في الانستقرام تلاقوا في هاشتاق
#rds_healthy
No comments:
Post a Comment