ريڤيو عن الفوريو ميني لونا

ايش الميني لونا؟

لونا هيا جهاز صغير يستخدم نفس استخدام الفرشه لتنظيف الوجه يعني زي كليراسونيك بس متطور اكتر في نظري. حجمه صغير قد الكف و فيه بدال الفرشه 

اسنان سيليكون صغيره و كبيره عشان تقشر و تنظف الوجه. في شاحن يو اس بي يجي معاه و لمن تشحني وحده مره ممكن تستخدمي ٣٠٠ مره بعدين تفضى البطاريه. انا من وقت ما جاني ما شحنته و لا مره. 

ايش مميزاته؟

الماده اللي مصنوع منها ما تجمع البكتيريا او الوسخ و لا تتبلل يعين المويا على طول تروح يصير ما يعفن او تطلع منه ريحه. بما انه مافي فرشه ما يحتاج انك تغيريها كل شويا زي الكليراسونيك.

كيف استخدمه؟ 

فيه زر من قدام (ما يبان في الصور) اذا ضغطتي مره وحده الحهاز يبدأ يهتز بشكل شويا سريع و اذا ضغطتي نفس الزر مره تانيه تصير الهز اقل شويا. الاهتزاز يوقف ٢٠ ثانيه و يبدأ تاني عشان ينبهك انك تبدئي تفركي منطقه تانيه من الوجه. 

انا ابلل الميني لونا و ابلل وجهي و بدأ افرك وجهي بصابون الوجه بعدها اخد الميني لونا و ابدأ بالخد اليمين احركها بشكل دائري للخارج ببطء لمدة ٢٠ ثانيه بعدين الخد اليسار و بعدها الدقن و بعدها الجبهه و بعدها الانف و بعدين اخفف الاهتزاز و امشيه تحت عيوني. طبعا كل جزء ٢٠ ثانيه الا الانف و العيون اسويها ١٠ ثواني مدري ليه. انا استخدمها بس في الليل بس ممكن تستخدم في الصباح و الليل.

رأيي النهائي فيها:

مره عجبتني، من جد حسيت فرق في بشرتي. صارت اصفى و احسها تتنظف بعمق كل يوم. الفتره اللي فاتت كنت متحسسه من كريم و طلعت لي حبوب كتيره و انا عادة ماشاءالله ما تطلع لي حبوب غير كل شهر مره مرتين. بعد ما استخدمت اللونا بشرتي رجعت عاديه و راحت الحبوب، و كمانا انا اثار الحبوب صعب تروح عندي بس اللونا مره ساعدتني حسيتها راحت بوقت اقصر من العاده. بالنسبه لنفس الجهاز عجبني انه سهل تاخدي في السفر لانه صغير و مره خفيف. و كمانا ما يحتاج تغيري رأس الفرشه او تشحنيها كل شويا. مره انصحكم بيها، سعرها ٦٠٠ ريال سعودي من صيدلية وايتس.