التغييرات اللي سويتها في ٢٠١٥

انا عمري ما احب فكرة انه الوحده تغير من شخصيتها غير اذا كان للأحسن و لصالحها. انا عشان اسوي هادي التغييرات البسيطه اخدت معايا وقت طويل. كل ما كنتي تبغي التغيير يكون جذري خلي بشكل متدرج. 

التغيير في الشخصيه

١- قللت التوتر، انا من النوع اللي يتوتر على طول من ابسط الأشياء. اعطيكم مثال و ممكن يعتبر شيء غبي بالنسبه لكم، لمن أكون متفقه مع صاحباتي اننا نطلع مطعم. لازم اكون مجهزه لنفسي وقت اتجهز في و وقت الطريق عشان اوصل على الوقت و انا دائما اكون على موعدي او قبله بشويا. طول اليوم اتوتر لاني عارفه في ورايا موعد حتى لو كان عادي اني اتأخر عليه و مو موعد مهم لسه اتوتر و اعصابي تنشد. 

حاولت اقلل قد ما اقدر من دا الشيء باني اهدي نفسي، لو اتأخرت ايش حيصير مثلا؟ ما اركز على الموعد طول اليوم اشغل نفسي باشياء تانيه الين ما يجي الوقت المحدد. احاول اخلي الموعد شيء يبسطني بدال ما يوترني. اركز على الحانب الايجابي اللي راجع ليا من الموضوع. 

٢- قللت التعصيب، بما انه اغلب وقتي اعصابي مشدوده لاني متوتره ممكن اعصب بسهوله. مثلا لو اتاخرت على حجزي في مطعم مره اتعصب و تنشد اعصابي و اي احد معايا يلاحظ هادا الشيء. اكره لمن الشيء ما يمشي على الخطه اللي انا راسمتها في عقلي. بس طبعا مو كل شيء في العالم يمشي على كيفنا. لمن بدأت اقلل من توتري قل التعصيب بشكل كبير. و كمانا صرت احاول انسى و امسك نفسي عشان ما اعكر مزاج اللي حواليني.

التغيير في الجسم

١- تركيزي على أكلي و صحتي صار أكبر، من اول كنت ما اقرأ و ادور عن الدايت و غيره فكنت اسوي اشياء قاسيه لمده قصيره و مالها فايده كبيره. اما دحين صار نظامي معتدل و هادا الشيء انعكس على صحتي و جسمي و كمانا بشرتي. صرت اكل كل شيء بس ببدائل صحيه. مثلا بدال مقلي مشوي و اكتر من الخضار و اقلل النشويات. و ما احرم نفسي من الحلى باني اخد ملعقه صغيره من اي شيء نفسي فيه. و طبعا وقفت المشروبات الغازيه. في الويك اند اطلع اكل و عادي ما اهتم لانه محافظه طول الاسبوع.

٢- تغيري في وزني، التغيير ما كان في الوزن بشكل كبير قد ما هوا في المقاسات. وزني ما بيقل مره بس المقاسات في الجينزات و الفساتين مره تفرق. ليش؟ لانه الدهون اللي في الجسم مع الرياضه بتنحرق و تتحول الى عضلات و العضلات تاخد مساحه اقل في الجسم مع انها نفس وزن الدهن. هادي نتيجة الاكل المعتدل و الرياضه على الاقل ٣-٥ ايام في الاسبوع.